பச்சைப்புடவைக்காரி -சீதையின் கண்களால் தெரியக்கண்டேன் ராமா ! 19 - 244

                                                 பச்சைப்புடவைக்காரி

என் எண்ணங்கள்

சீதையின் கண்களால் தெரியக்கண்டேன் ராமா ! 19

(244) 👍👍👍💥💥💥

ஜாம்பவான் கவனமும் அனுமன் பக்கமே - இங்கே எல்லோரும் மனஉளைச்சல் கொண்டு அடுத்த வழிக்கு வழி இல்லாமல் தவித்துக்கொண்டிருக்கிறோம் அனுமனால் எப்படி பிரச்சனைக்குள் வராமல் தனித்து இருக்க முடிகிறது ? இதுவும் அவருக்கு இறைவன் கொடுத்த வரமாகத்தான் இருக்கவேண்டும். 

மெதுவாக தன்  கரங்களை அனுமனின்  தோள்களில் பதித்தார் - அவர் பதித்த விதத்தில் இருந்தே ஜாம்பவானின் எண்ண  ஓட்டங்களை புரிந்துகொண்டார் அனுமான் --- 

மெதுவாக மெல்லிய குரலில் கேட்கிறார் ஜாம்பவானிடம் --- ஐயனே என்னால் ஏதாவது காரியம் இங்கே செய்யமுடியும் என்று நினைக்கிறீர்களா - உத்தரவு இடுங்கள் ராம நாமத்தால் செய்து முடிக்க முயற்சி செய்கிறேன் ..

ஜாம்பவானின் கண்களில் இருந்து  கண்ணீர் தாரை தாரையாய் கொட்டியது - அதைப்பார்த்த அனுமனுக்கு வாலியின் மனைவி தாரையின் நினைவு வந்தது -

- தாரையை பார்க்கும் போதெல்லாம் அனுமனுக்கு தன் தாய் அஞ்சலையின் ஞாபகம் தான்  வரும் --- தாரை ஒருமுறை அனுமனிடம் -- நீ வாலிக்கு அமைச்சராக இருக்கக்கூடாதா - உன் பரிசம் பட்டாலே அவனுக்கு நல்ல புத்தி வந்துவிடுமே 

மேலும் வாலிக்கு உன் மீது எந்த கோபமும் இல்லை -- நீ இங்கு வந்து வாலியுடன் கொஞ்ச நாட்கள் இருந்தால் அண்ணனும் தம்பியும் சண்டைகளை மறந்து ஒற்றுமையாகி விடுவார்களே என்று கெஞ்சினாள் - 

அனுமன் பதில் சொன்னான் - தாயே உங்கள் வருத்தம் புரிகிறது -- நான் இப்பொழுது வந்து வாலியின் பக்கம் சேர்ந்தாலும் இதுவும் சுக்கிரவனின் சூழ்ச்சிகளில் ஒன்று என்று எண்ணி என்னையும் கொல்ல  வருவான் -- நான் இறப்பதற்காக வருத்தப்படவில்லை - ஆனால் நம்பிக்கைத்துரோகம் செய்து வாழ மாட்டேன் - இப்பொழுது உதவி , துணை பரிவு எல்லாமே சுக்ரீவனுக்கு மட்டுமே தேவை வாலிக்கு இல்லை .. தாரை ஒப்புக்கொண்டாள் ..

ஜாம்பவான் பேச ஆரம்பித்தார் - ஆஞ்சநேயா -- எல்லோரும் வாழ்வதா சாவதா என்பதைப்பற்றி பேசிக்கொண்டிருக்கிறோம் --- 

இந்த கடலைத்தாண்டவேண்டும் - இலங்கை சேரவேண்டும் அங்கே சீதா பிராட்டியை தேடி கண்டு பிடிக்கவேண்டும் அவளை ராமனின் தூதன் என்று நம்ப வைக்க வேண்டும் நம்ப வைப்பதோடு இல்லாமல் ராமன் சீதையை பார்த்தேன் என்பதற்கு சீதையிடம் ஏதாவது சாட்சி வாங்கிக்கொண்டு வரவேண்டும் - இவ்வளவு நடப்பதற்குள் இங்கிருந்து போகுபவன் உயிருடன் இருக்கவேண்டும் . 

சொல்லுங்கள் ஜாம்பவான் அவர்களே நான் ஏதாவது இதில் செய்வேன் என்று உங்களுக்கு நம்பிக்கை இருக்கிறதா ? 

ஜாம்பவான் :  நம்பிக்கை மட்டுமா?  எங்கள் எல்லோருடைய உயிர்களும் உன் கையில் தான் இருக்கிறது 

உன்னால்  முடியாதது ஒன்று இருக்கிறது என்றால் அது  பிராட்டியை பார்க்காமல் திரும்பி வருவதுதான் ..சங்கர சுவானா - சீதா பிராட்டி சிறைப்பட்டு அழுதுகொண்டிருக்கிறாள் .நாங்கள் சிறைப்படாமல் அழுது கொண்டிருக்கிறோம் - 

அவள் கண்ணீரும் கடலில் சேருகிறது எங்கள் கண்ணீரும் கடலில் சேருகிறது - ராமன் வராததால் சீதா பிராட்டிக்கும் ஆத்ம தியாக செய்துகொள்ளவேண்டும் என்று எண்ணம் வந்திருக்கலாம் எங்களுக்கும்  அதே எண்ணம் வந்திருக்கிறது 

சீதா பிராட்டியை இங்கிருந்து ஒருவர் தேடப்போகும் போது நம்மையும் தேடி சுக்ரீவன் ஆட்களை அனுப்பலாம் .

எல்லா வகையிலும் நாம் எல்லோருமே சீதா பிராட்டியின் நிலைமையில் தான் இருக்கிறோம் ..

நீ தான் இங்கிருந்து பறந்து லங்கை அடையவேண்டும் உன்னைப்போல் சாதிப்பவர் யாரும் பிறக்கவில்லை பிறக்கப்போவதும் இல்லை -- உன்னைப்போல் உத்தமன் வாழ்ந்ததாக சரித்திரம் இல்லை இனியும் வாழ்வான் என்ற நம்பிக்கையும் இல்லை - உன்னைப்போல இறை பக்தி இருப்பவனை நான் கண்டதில்லை இனியும் காணப்போவதும் இல்லை .. 

நீ வெற்றி அடைய வெறும் ராம நாமம் மட்டுமே போதாது - சீதா பிராட்டியின் கருணையும் அருளும் வேண்டும் - தாயாரின் கடாக்ஷம் மட்டுமே முழு வெற்றியையும் ஒருவனுக்குத் தேடித்தரும் 

அவளை மனமார வேண்டிக்கொண்டு இங்கிருந்து கிளம்பு சங்கர சுவானா - ஒரு தாயின் கண்ணீரை நீ துடைக்கப்போகிறாய் அதுவும் உலக மாதாவின் கண்ணீரை - யாருக்கு இந்த பாக்கியம் கிடைக்கும்? - 

ராமனாலும் தன் தாய்மார்கள் அழுவதை நிறுத்த முடியவில்லை -- உன்னால் அது முடிகிறது என்றால் அந்த தாயின் கடாக்ஷமே மூலக்காரணம் 

அம்மா நேரில் பார்ப்பதைப்போல் இருக்கிறது --- அனுமனின் திறமைகள் கடலை விட ஆழமானதாகவும் வானத்தை விட நீண்டும் இருக்கிறது 

புன்னகைத்தாள் பொன்  மேனியாள் -- பூவுலகம் பூ மழை பொழிந்தது 

ஜன்ம ம்ருத்யு ஜராதப்த ஜன விஶ்ராம்தி தாயினீ |  जन्म-मृत्यु-जरा-तप्त-जन-विश्रान्ति-दायिनी .    

இந்த உலகில் தோன்றியவர்கள்,  தோன்றியவைகள், எல்லாமே  பிறப்பு, வயோதிகம், முதுமை,  இறப்பு என்ற வழியில் தான் தப்ப முடியாமல் செல்லவேண்டும். 

மீண்டும் அதே.  அவர்களுக்கு ஆறுதல் தரும் ஒரே தெய்வம் அம்பாள் ஸ்ரீ  லலிதை தான்.  தாயல்லவா?  முக்தி ஒன்றே இந்த பந்தத்திலிருந்து விடுபடும் மார்க்கம்.  

ஸ்வர்கம் என்பது நிரந்தரவாசமல்ல . ஒரு குறிப்பிட்ட காலத்துக்கு மட்டும் தான்.  அப்புறம் விடுதியை காலி செய்துவிட்டு கீழே இறங்கவேண்டும். முக்தி என்பது  ஆத்மா  இறைவனோடு ஒன்று  சேர்வது. அதற்கு  பிறப்பு இறப்பு இல்லை.  அது தான் ப்ரம்மத்தோடு கலந்துவிட்டதே. அதற்கு தனியாக எந்த அடையாளமும் இல்லையே.

ஸர்வோபநிஷதுத்குஷ்டா, सर्वोपनिषदुद्गुष्टा    எல்லா உபநிஷதங்களும் போற்றுவது அம்பாளைத்  தானே.  அவள் உயர்ந்த ஸ்தானத்தில் உள்ளவள். சக்தி வாய்ந்தவள். அவள் சொல்லுக்கு மறுப்பு இல்லை.  ஞானத்தை தருபவை  உபநிஷதங்கள். அவற்றின் உருவம் அவள்.  ப்ரம்ம ஸ்வரூபம்.  அவளில்லையேல் சிவன் இல்லை. பக்தர்களை சிவனிடம் கொண்டு சேர்ப்பது சக்தி தான்.

உபநிஷதங்கள்  வேதங்களின் சாரம். அந்தம். முடிவு.  ப்ரம்ம ஞானத்தை அடைய உதவுவது.  உபநிஷதங்களுக்கு  ஞான காண்டம் என்று பெயர் உண்டு. பிரம்மத்தை அறிய, தெரிய, உணரச்  செய்வதால்  இந்த பெயர்.  சாந்தோக்ய உபநிஷத்  (I.i.10) “ ஞானமும், அறியாமையும் வெவ்வேறு முடிவை தருபவை. ஞானத்தை அறிவதன் மூலம், ஆச்சர்யன் மேல் பக்தி, நம்பிக்கை கொண்டு அதை உணர்பவன், தெளிபவன்,  வேதங்களை அறிபவன் பயன் அடைகிறான்'' என்கிறது.  ரிஷிகள் பலர் இப்படி எல்லாம் அற்புதமாக எழுதி வைத்து விட்டு போயிருக்கிறார்கள்.  அஞ்ஞானம் என்ன செய்யும் என்று சொல்லவோ  எழுதவோ வேண்டாம். அனுபவிக்கிறோமே  தெரியாதா? போதாதா?

உபநிஷதங்கள் ப்ரம்மத்தோடு ஆன்மாவை இணைப்பவை என்கிறது ப்ரம்ம சூத்ரம்.  (III.iii.1),இப்படி  ஆன்மாவுக்கும்  ப்ரம்மத்துக்கும்  இணைப்பு பாலமாக விளங்குபவள் அம்பாள். 

                                                    =======================