பச்சைப்புடவைக்காரி --- நான் என்ற எண்ணம் கொண்ட மனிதன் வாழ்ந்தது இல்லை .

பச்சைப்புடவைக்காரி

என் எண்ணங்கள்

நான் என்ற எண்ணம் கொண்ட மனிதன் வாழ்ந்தது இல்லை ...

அம்மா  ராவணன் சிறந்த சிவபக்தன் -- அவன் இசைக்கும் வீணையில் காம்போதியை கலந்து அவன் சாம வேதம் சொல்லும்போது அந்த கையிலாயமே உருகியதாமே அம்மா!  

மிகுந்த ஞானமும் படிப்பும், அறிவாற்றலும், 1000 மதம் கொண்ட யானைகளின் பலமும் கொண்டவன் என்று கேள்விப்பட்டேன் - இப்படிப்பற்ற அறிவாற்றல் பெற்ற, தேவர்கள் ஆசிர்வாதங்களைப்பெற்ற ஒருவன் எப்படியம்மா ஒரு அரக்கனாக முடியும் - 

நல்ல குணங்களும் சிவ சிந்தனையும் உள்ளவன் ஒரு ராக்ஷஸன் ஆக முடியுமா - அவன் மனதில் தீய எண்ணங்கள் வர வாய்ப்புள்ளதா?  பிறப்பால் சிறந்தவன், படிப்பினால் உயர்ந்தவன், சிவ சிந்தனையால் உயர்ந்த பதவியை அடைந்தவன் கேவலம் இன்னொருவருடைய மனைவிக்கு ஆசைப்படுவானா அம்மா - என்னால் இதை ஜீரணிக்கவே முடியவில்லை ----

மேலும் யாரெல்லாம் சிறந்த பாக்கியவானாக இருக்க முடியும் தாயே?

ரவி   அரக்கர்கள் பலரை எடுத்துக்கொள் -- 

சூரபத்மன் ---மேலே பறந்து கீழே செங்குத்தாக வைத்திருந்த கதையில் விழுந்து பிறகு நெருப்புக்கொண்டத்தில் விழுந்து உயிரைவிட்டான் -- 

அவன் தம்பி மட்டும் காப்பாற்றாமல் இருந்திருந்தால் அவன் அன்றே அழிந்திருப்பான் - இவன் படிக்காத,தெரிந்துக்கொள்ளாத வித்தைகளா ? கடவுளை காண வேண்டும் என்றே ஒரே குறிக்கோள் -- அவர் நேரே வந்ததும் தனக்கு அழிவைத்தேடும் வரங்களைத்தான் பெற்றுக்கொண்டான் ----

இவனை விட அதிகம் படித்தவன் , வீராதி வீரன் , சூராதி சூரன் இரண்யகசிபு -- மும்மூர்த்திகளின் ஆயுதங்களாலும் தனக்கு அழிவே வரக்கூடாது என்று சாமர்த்தியமாக வேண்டினான் -- 

பிரம்மாவிடம் மட்டுமே ஆயுதங்கள் கிடையாது - பிறகு இரு மூர்த்திகள் என்று சொல்லாமல் ஏன் மும்மூர்த்திகளின் ஆயுதங்களால் மரணம் வரக்கூடாது  என்று வரம் கேட்டான் ?--- 

கமண்டலத்தையும் , தண்டத்தையும் மட்டுமே வைத்துக்கொண்டிருக்கும் ரிஷிகளின் நாக்கிலே குடிகொண்டிருப்பது பிரம்மா -- அவர்கள் நாக்கினிலேயிருந்து வரும் வார்த்தைகளாலும் , சாபங்களாலும் கூட தப்பித்தவறி கூட  தனக்கு மரணம் வாய்க்கக்கூடாது  என்று வெகு சாமர்த்தியமாக மும் மூர்த்திகளின்  ஆயுதங்களாலும் தனக்கு மரணம் வரக்கூடாது என்று வரம் பெற்றுக்கொண்டான் - 

ஆனாலும் வரங்கள் அவனுக்கு நிரந்தர வாழ்க்கையை கொடுக்கவில்லை --- 

ராவணனனை எடுத்துக்கொள் -- இவன் பெறாத வரமா ?  கடும் தவம் செய்தவன் - வேதங்கள் இவனுக்கு அத்துப்படி -- 10000 ஆண்டுகள் தவம் செய்தான் - ஒவ்வொரு 1000 ஆண்டுகளுக்கும் ஒருமுறை தன் பத்து தலைகளில் ஒன்றை கொய்து ஹோம அக்னியில் கடவுளுக்கு சமர்ப்பித்தான் --- எதிலும் தனக்கு மரணம் வரக்கூடாது என்று வரம் பெற்றவன் மனிதனால் மரணம் வரக்கூடாது என்று கேட்கவில்லை - கேவலம் தன்னை ஒரு மனித புதர் என்ன செய்துவிட முடியும் என்ற இறுமார்ப்பு ------

மேலே சொன்ன அத்தனைபேரும் ஞான பண்டிதர்கள் - இறைவனை நேரில் பார்த்தவர்கள் - நீங்கள் அப்படி பார்க்க நேரிட்டால் உங்களுக்கு  எல்லாம் மறந்து விடும், எதையும் கேட்கத்தோனாது - 

ஆனால் இவர்களோ, இறைவனை முழுவதும் பார்த்ததோடு மட்டும் அல்லாமல் பட்டியல் போட்டு, ஒன்றையும் மறக்காமல் எல்லா வரங்களையும் கேட்டு வாங்கிக்கொண்டார்கள் --- ஆனால் மனதில் நல்ல எண்ணங்களை நிரப்பிக்கொள்ள மறந்து போனார்கள்...

ராக்ஷஸ --- இந்த வார்த்தையை திருப்பி போட்டுப்பார் -

ஸக்ஷரா என்ற வார்த்தை வரும் -   அக்ஷரா என்பது என்  திருநாமம் - வார்த்தைகளால் அலங்கரிக்கப்படுபவள் என்று பொருள் - 

அ என்று தொடங்கும் முதல் எழுத்தில் இருந்து கடைசி எழுத்தான ரா வரை ஓவ்வொரு எழுத்துல நான் நிறைந்து இருக்கிறேன்  என்று பொருள்..... 

ஸம்ஸ்கிரத்தில் ஸ என்ற வார்த்தை இரண்டு வார்த்தைகளை இணைப்பதற்காக உபயோகப்படுத்துவது - 

உதாரணம் சோமஸ்கந்தர் என்பதை  ஸ + உமா + கந்தர்  என்று பிரிக்கலாம் - அதாவது உமாவும் கந்தனும் இணைந்த என்ற அர்த்தம் வருகிறது -- ஸ+க்ஷரா என்பது - மிகவும் உயர்ந்தவர் , ஞானி என்று பொருள்  -- 

சுருக்கமாக சொன்னால் ஒரு உயர்ந்த ஞானி கெட்ட  எண்ணங்களை , தகாத எண்ணங்களை , மட்டமான ஆசைகளை மனதில் வளர்த்துக்கொள்வதால் ஸக்ஷராவாக இருந்தவர்  குறுகிய காலத்தில்  ஒரு ராக்ஷஸனாக மாறி விடுகிறான் - அவனின் உயர்ந்த படிப்போ , ஞானமோ அவனை காப்பாற்ற வருவதில்லை ...

ரவி  எவ்வளவு படித்திருந்தாலும், ஞானம் பெற்றிருந்தாலும், சாக்கடை போன்ற அசுத்தமான எண்ணங்களை உடையவன் ஒரு ராக்ஷஸனே !  

இங்கே பார்த்த எந்த புத்திசாலிகளும் தங்கள் அறிவை தங்க வைக்க ஆண்டவனை வேண்டவே இல்லை -- 

நிரந்தரமான வாழ்க்கையை மற்றவர்களை இம்சித்து வாழும் வாழ்க்கையைத்தான் இறைவனிடம் வேண்டினார்கள் -- மரணம் வரக்கூடாதது என்று வேண்டினால் அது இன்னும் விரைவாக ஒருவனை வந்தடையும் - 

மரணம் வந்தால் வரட்டும் - இறைவன் இருக்கிறான் - அவன் நம்மை பார்த்துக்கொள்வான் என்று இருந்தால் மரணமும் நம்மைக்கண்டு பயந்து ஓடி விடும் - அப்படிப்பட்ட ஞானிகளைத்தான் நாம் சிரஞ்சீவி என்று சொல்கிறோம் ----

உன் அடுத்த கேள்வி -- யாரெல்லாம் பாக்கியவான்கள் என்று சொல்லப்படுவார்கள் - சொல்கிறேன் கேள் --- 

1. ராம நாமத்தை சொல்பவன் எவனோ பூமியில் அவனே பாக்கியவான்

2. காம குரோதத்தைக் கட்டுப்படுத்தியே பூமியில் வாழ்பவன் பாக்கியவான்

3.பொய்யுரைக்காமல் மெய் சிதைக்காமல் வையத்தில் உள்ளவன் பாக்கியவான்

4. கள்ளம் கபடுகள் உள்ளத்தில் இல்லாத வெள்ளை குணத்தவன் பாக்கியவான்

5.நண்பர்களுடைய நலத்தினைக் கோரும் பண்புடையவனே பாக்கியவான்

6.பெற்றவரைப் பேரானந்தப் படுத்தும் குற்றமற்றவனே பாக்கியவான்

7.ஆசை எண்ணியே மோசம் போகாமலே பாசமற்றவனே பாக்கியவான்

8. துன்பம் வந்தாலும் துக்கம் இல்லாமல் இன்பமாக்குபவன் பாக்கியவான்

9.யாதொரு ஸ்தீரியையும் மாதவென்றெண்ணிடும் போரில்லாதவனே பாக்கியவான்

அம்மா யார் பாக்கியவனோ இல்லையோ -- நான் பாக்கியவான் -- உங்களிடமிருந்து மிக அழகான விளக்கத்தை பெற்றதற்கு ---- சிரித்துக்கொண்டே மறைந்து போனாள் என் மனதை திருடிய மதுரைக்காரி