பச்சைப்புடவைக்காரி - ஜொலிக்கும் மாணிக்க மூக்குத்தி

பச்சைப்புடவைக்காரி

என் எண்ணங்கள்

ஜொலிக்கும் மாணிக்க மூக்குத்தி 

கம்ப ராமாயணம் படித்துக்கொண்டிருந்தேன் ... பச்சைப்புடவைக்காரி அருகில் அமர்ந்ததையும் கவனிக்காமல் - எனக்கு நானே பேசிக்கொள்வதை அன்னை கேட்டு ரசித்துக்கொண்டிருந்தாள்

இராவண வதம் முடிந்து இராமன் அயோத்தி நோக்கி வந்து கொண்டிருக்கிறான். வருகிற வழியில் பரத்துவாஜ முனிவரை சந்திக்கிறான். அவர், பரதன் நிலை பற்றி இராமனுக்கு கூறுகிறார்.

வெயர்த்த மேனியன்; விழி பொழி மழையன்; மூவினையைச்

செயிர்த்த சிந்தையன்; தெருமரல் உழந்து உழந்து அழிவான்;

அயிர்த்து நோக்கினும், தென் திசை அன்றி, வேறு அறியான்

பயத்த துன்பமே உருவு கொண்டென்னலாம்  படியான்

பொருள்

வெயர்த்த மேனியன்;  = வியர்வை வழியும் மேனியை உடையவன். காரணம், சாமரம் வீசக் கூட ஆள் வைத்துக் கொள்ளவில்லை

விழி பொழி மழையன்; = விழிகள் மழை போல் கண்ணீரை சொரிகின்றன

மூவினையைச் = மூன்று வினைகளை, மூழுகின்ற வினைகளை

செயிர்த்த சிந்தையன்; = கோபித்த சிந்தையன்

தெருமரல் = மன மயக்கத்தால்

உழந்து உழந்து அழிவான்; = உழன்று உழன்று அழிவான்

அயிர்த்து நோக்கினும் = ஐயம் கொண்டு பார்த்தாலும்

தென் திசை அன்றி = தென் திசை அல்லாது

வேறு அறியான் = வேறு திசை ஒன்றையும் அறிய மாட்டான்

பயத்த = பயத்துடன் கூடிய

துன்பமே  = துன்பமே

உருவு கொண்டென்னலாம்   = உருவமாக உள்ளவன் என்று சொல்லலாம்

படியான் = அப்படி இருந்தான்

என்னப்பா --- கம்ப ராமாயணம் தேனாக இனிக்கிறதா ?

அம்மா தாங்களா ?  தாயே - தாங்கள் வந்ததை கவனிக்க வில்லை

பரவாயில்லை சும்மா இல்லாமல் ராமாயணத்தைத்தானே புரட்டிக்கொண்டிருந்தாய் .......

சீதை ,ஊர்மிளா  மாண்டவி ,சுருதகிருதி இவர்களது தியாகங்கள் அதிகம் பேசப்படுவதில்லை ஆனால் இவர்கள் அனைவரையும் பெண் தெய்வங்கள் என்று புகழும் படி இவர்களது தியாகங்கள் இவர்களை உயர்வடைய செய்தன

 .... இனி ராமனின் தம்பி மார்களை பார்ப்போம்

இராமனை காட்டுக்குப்போ என்றாள் கைகேயி.

இலக்குவனை கூடப்போ என்று யாரும் சொல்லவில்லை. அண்ணன் கூட அவனும் கிளம்பி விட்டான்.

சரி, அவர்கள்தான் போனார்கள், பரதன் என்ன செய்தான்?

உங்களது நெருங்கிய உறவினர் யாரவது இறந்து விட்டால் கூட, ஓரிரண்டு வருடம் துக்கம் நீங்கள் காப்பீர்கள் , அப்புறம் நாளடைவில் அது மறைந்து விடும்.

பரதன், 14 வருடம் அண்ணனை நினைத்து தவம் இருக்கிறான், நந்தியம்பதி  என்ற  கிராமத்தில். அரண்மனை சுகம் அனைத்தையும் விட்டு விட்டு அண்ணணனை நினைத்து  ஏங்கி நிற்கிறான்.

உங்களால் , நினைத்துப் பார்க்க முடியுமா ?

அப்படி ஒரு சகோதர பாசமா?

மனைவியை விட்டு விட்டு இலக்குவன் போனான்.

மனைவியை விட்டு விட்டு பரதன் ஊருக்கு வெளியே கிராமத்தில் இருந்தான்.

சரி, இலக்குவன் போனான். பரதன் போனான். சத்ருகன் என்ன செய்தான்?

அவனும் அரண்மனையை துறந்து, பரதன் கூடவே இருந்தான்.

சகோதரர்கள் இடையே இப்படி ஒரு பாசத்தை காண முடியுமா ?

ஒரு தாய் வயிற்று பிள்ளைகள் கூட இல்லை.  மாற்றாந்தாய் மக்கள். அவர்களுக்குள் இப்படி ஒரு பாசமா?

தசரதனுக்கு தன் குலம் விளங்க ஒரு வாரிசு இல்லையே என மனக்கவலை உண்டு. பல தெய்வங்களையும் வணங்கி, பல யாகங்களையும் ஒரு பிள்ளையை வேண்டி செய்தார். அதன் பலனாய் அவருக்கு ஒன்றுக்கு நான்கு பிள்ளைகள் பிறந்தனர். இது ஏனென்று உங்களுக்குத் தெரியுமா? இதன் பின்னால் ஒரு வாழ்வியல் தத்துவம் உண்டு

தர்மம் நான்கு வகைப்படும். அதில் முதலாவது சாமான்ய தர்மம். 

பிள்ளைகள் பெற்றோரிடம் எப்படி நடந்து கொள்ள வேண்டும்? சீடன் குருவிடம் எப்படி நடந்து கொள்ள வேண்டும்? கணவன் மனைவியிடம் எப்படி நடந்து கொள்ள வேண்டும்? இத்தகைய சாமான்ய தர்மங்களை ராமன் தானே பின்பற்றி உலகுக்கு எடுத்துக் காட்டினான்.

இரண்டாவது சேஷதர்மம். 

சாமானிய தர்மங்களை ஒழுங்காகச் செய்துக்கொண்டு வந்தால் கடைசியில் ஒரு நிலை வரும். அந்த நிலையில் பகவானுடைய பாதங்களைத் தவிர வேறு ஒன்றும் நிரந்தரம் அல்ல என்ற நினைப்பு ஏற்படும். இத்தகைய தர்மத்துக்கு சேஷ தர்மம் என்று பெயர். இதைப் பின்பற்றி லட்சுமணன் நடந்து காட்டினான் .

மூன்றாவது விசேஷ தர்மம் தூரத்தில் இருந்துக்கொண்டே எப்போதும் பகவானின் சிந்தனையாகவே இருப்பது விசேஷ தர்மம். இது சேஷ தர்மத்தைக் காட்டிலும் கடினமானது. இதைக் கடைப்பிடித்துக் காட்டியவன் பரதன்.

நான்காவது விசேஷதர தர்மம் பகவானை விட அவருடைய அடியார்களுக்குத் தொண்டு செய்வதே முக்கியம் எனக் கருதுவது விசேஷதர தர்மம். சத்ருகன் பாகவத உத்தமனாகிய பரதனுக்குத் தொண்டு செய்தே கரையேறி விட்டான். ஆக, இந்த நான்கு தர்மங்களையும் இராமாவதாரத்தில் நான்கு புத்திரர்கள் மூலம் உலகுக்கு எடுத்துக் காட்டவே தசரதருக்கு நான்கு குழந்தைகள் பிறந்தன.

உனக்குத் தெரியுமா ரவி ? 

கேரளாவில் ஆடி மாதம், 'ஆன்மிக மாதமாக' கொண்டாடப்படுகிறது. முக்கியமாக ஆடி மாதத்தை, 'ராமாயண மாதம்' என்றே கேரள மக்கள் அழைக்கிறார்கள். இங்கு சகோதரர் பாசத்தை வெளிப்படுத்தும் விதமாக ராமன், பரதன், லட்சுமணன், சத்ருகனன் ஆகிய நான்கு பேருக்கும் தனித்தனியே கோயில்கள் எழுப்பி, மக்கள் வழிபட்டு வருகின்றனர். அத்துடன் ஆடி மாத்தில், ஒரே நாளில் நான்கு கோயிலுக்கும் சென்று வழிபடுவது மிகவும் சிறப்பு வாய்ந்ததாகக் கருதப்படுகிறது. இதனால், குடும்பத்தில் சகோதரத்துவ பாசம் நீடித்து நிலைக்கும் என்பது ஐதீகம்.

அம்மா உங்களிடம் விளக்கம் கேட்ட பிறகு ராமாயணத்தை முழுவதும் கரைத்து குடித்ததைப்போன்ற ஒரு உணர்வு தாயே --- உங்களுக்கு நான் எவ்வளவு யுகங்கள் எடுத்தாலும் என் நன்றியை சொல்லி மாளாது 

சிரித்துக்கொண்டே சிங்காரமாய் மங்கை நடந்தாள்  மாணிக்க மூக்குத்தி ராமாயணத்தில் நான்கு சகோதரிகளும் சகோதரர்களும் செய்த தியங்கங்கள் போல் ஜொலித்தது