அபிராமி அந்தாதி - பாடல் 69`(1) - தனம் தரும் கல்வி தரும் -

 

                    பச்சைப்புடவைக்காரி -511

அபிராமி அந்தாதி 

பாடல் 69(1)

இன்றைய பாடல் எல்லோரும் ஆவலாக எதிர்பார்த்துக் கொண்டிருக்கும் பாடல் .. 

அபிராமி அந்தாதியில் இரண்டு பாடல்களை நாள் தோறும் சொல்லி வந்தால் நமக்கு மனக்குறை என்று ஒன்றுமே இருக்காது . 

இந்த பாடலும் பாடல் 52 ம் ... எல்லாம் தருபவள் என்பதை கண் கூடாக அனுபவிக்கலாம் 

பாடல் 52

வையம், 

துரகம், 

மதகரி, 

மாமகுடம், 

சிவிகை

பெய்யும் கனகம், பெருவிலை ஆரம், 

பிறைமுடித்த

ஐயன் திருமனையாள் அடித்தாமரைக்கு, அன்பு முன்பு

செய்யும் தவம் உடையார்க்கு உளவாகிய சின்னங்களே.🙏🙏🙏

பட்டருக்கு சம்ஸ்கிருதம் நன்றாக வரும் ஆனால் பிறரை போல் அதிலேயே பாடாமல் நமக்காக சுத்த தமிழில் பாடியுள்ளார் .. 

கடாக்ஷம் , கனம் இவைகள் சம்ஸ்கிருத வார்த்தைகள் .. கடாக்ஷம் என்பதை *விழியின் கடை* என்று தமிழில் அழகான சொல்லாய் மாற்றினார் .. 

கண்ணோட்டம் என்றாலும் கடாக்ஷம் என்று பொருள் தரும் ... 

இந்தக்காலத்தில் மாண்புமிகு என்று ஒருவரை அழைக்கிறோம் ... 

அந்த காலத்தில் கனம் பொருந்திய ... என்று அழைப்பார்கள்... 

அதாவது பெருமை பொருந்திய என்று அர்த்தம் ... கனபாடிகள் என்று இதிலிருந்து தான் வந்தது ... 🥇🥇🥇

பாடலை பார்ப்போம் 🙏🙏🙏

*தனம் தரும் கல்வி தரும் (பாடல் 69)*🤝🤝🤝

தனம் தரும்

பொருள் மிகவும் முக்கியம் .. மாணிக்கவாசகர் பொருள் தன்னிடம் இல்லாததால் தானே அரச பணத்தை வைத்து கோயில் கட்டினார் . 

கலியன் எனும் திருமங்கை ஆழ்வாரும் திருடி தானே ஸ்ரீரங்கம் கோயில் கட்டினார் ... பூசலார் மாதிரி இன்னொருவரை நாம் பார்த்ததில்லையே .. 

எல்லாவிதமான செல்வங்களும் தரும்

கனம்  என்பது சமஸ்கிரதத்தில் மாற்றி போடுதல் என்று பொருள் அதாவது வேதத்தில் ஒரு வார்த்தையை தூக்கி வேறு இடத்தில் போட்டு அந்த வார்த்தையை இங்கு போட்டாலும் பாடலின் பொருள் மாறாது அப்படிப்பட்ட பாடல் இது .. தெய்வ வடிவு தரும் என்றும் பாடலை ஆரம்பிக்கலாம் . பொருள் அதே !!👌👌👌

அடுத்தது *கல்வி*  

எவ்வளவோ பேர்கள் என் படிப்புக்கு ஏற்ற வேலை , சம்பளம் இல்லை என்று கவலைப்படுகிறார்கள் ..

இப்பொழுது சொற்களை பிரிக்காமல் ஒரே சொல்லாக சொல்லிப் பாருங்கள் ... அந்த கவலை அழிந்து போகும் ... 

தனம் தரக்கூடிய கல்வி தரும் ... அதாவது சரியான அளவிற்கு தனம் கிடைக்கும் ..  கல்வி இல்லை என்றால் சேர்த்த பணத்தை நம்மால் சரியாக செலவழிக்கத் தெரியாமல் போய் விடும் .. 

நம்மை ஏமாற்றும் கூட்டம் அதிகரித்து விடும் ...  இப்படியும் எடுத்துக்கொள்ளலாம் ஞானம் எனும் தனம் தரும் அதை உணரக்கூடிய கல்வி எனும் அறிவைத் தரும் ..  

எதைக் கேட்பது என்பது நம் கையில் தான் இருக்கிறது .. அழியாத ஞான செல்வமா இல்லை அழிந்து போகும் பொருள் செல்வமா ??

தனம் கிடைத்து விட்டது  அதை பெறக்கூடிய கல்வியும் கிடைத்து விட்டது ... இன்னும் என்னவெல்லாம் கிடைக்கும் ? ( பேராசை யாரை விட்டது ??)

நாளும் தளர்வு அறியா மனம் தரும் - 

என்றும் சோர்ந்து போகாத மனமும் தரும்... 

வயதாகலாம் 

உடம்பில் முதிர்ச்சி தளர்வு , இயலாமை தள்ளாமை என்று  எல்லா ஆமைகளும் வரலாம் 

ஆனால் 20 வயதில் நமக்கு இருக்கும் மனமும் சுறுசுறுப்பும் உறுதியும் கிடைத்து விட்டால் வயது நம்மை என்ன பண்ண முடியும் ? 

இப்பொழுது  நல்ல சம்பளம் நல்ல படிப்பு இவை இருந்தும் அடிக்கடி I'm depressed என்ற வார்த்தையை கேட்கிறோம் 

அவர்களுக்கு இருப்பது தளர்வை தரும் மனம் .. உறுதியின்மை ... அம்பாள் இளமையான தளர்வில்லாத உறுதியான மனத்தை தருகிறாள்

இவ்வளவு தானா ?? 🤔🤔🤔

தெய்வ வடிவும் தரும்

தெய்வீகமான உருவத்தையும் தரும்...  அம்பாள் உபாசகர்களை பார்த்தால் முகத்தில் தெய்வீக ஒளி தெரியும் .. சிலரை பார்த்தவுடன் யாருமே சொல்லாமல் கை எடுத்து கும்பிடும் எண்ணம் நமக்கு வரும் ..  

இவர்கள் அபிராமியின் அருள் உடையவர்கள் .. தெய்வீக ஒளி உடையவர்கள் 

 நெஞ்சில் வஞ்சம் இல்லா இனம் தரும் -

உள்ளொன்று வைத்துப் புறமொன்று பேசாத நண்பர்களைத் தரும்.. நல்லவர்களின் சேர்க்கை கிடைக்கும் அருளார்களின் சம்பந்தம் நமக்கும் கிடைக்கும்

இவ்வளவு தானா ?? 🤔🤔🤔

பட்டருக்கு கோபம் வந்து விட்டது .. இன்னும் கேட்டுக்கொண்டே இருக்கிறாயே என்று சொல்லி விட்டு பட்டென்று சொல்கிறார் 

 நல்லன எல்லாம் தரும் -

இன்னும் என்ன என்ன நன்மைகள் எல்லாம் உண்டோ அவை அனைத்தையும் தரும்

இப்படித்தான் இது கிடைக்கும் அது கிடைக்கும் என்று சொன்ன ஒரு ஆழ்வார் தளர்ந்து போனார் .. யார் அவர் 🤔🤔

குலம் தரும் 

செல்வம் தந்திடும்

அடியார் படு துயர் ஆயின எல்லாம்

நிலம் தரம் செய்யும் 

நீள் விசும்பு அருளும்

அருளொடு பெரு நிலம் அளிக்கும்

வலம் தரும் 

 *மற்றும் தந்திடும்* 

பெற்ற தாயினும் ஆயின செய்யும்

நலம் தரும் சொல்லை நான் கண்டுகொண்டேன்

நாராயணா என்னும் நாமம். 

----திருமங்கை ஆழ்வார் 💐💐💐

மாணிக்க வாசகர்  வேறு விதமாக பட்டரையும் திருமங்கை ஆழ்வாரையும் மிஞ்சும் வண்ணம் பாடி விட்டார் .. 

ஏன் இது தருவான் அது தருவான் என்று சொல்லிக்கொண்டே தளர்ச்சி அடையவேண்டும் ... என்று நினைத்து இப்படி பாடுகிறார் 

வேண்டத் தக்க தறிவோய்நீ 

வேண்ட முழுதும் தருவோய்நீ

வேண்டும் அயன்மாற் கரியோய்நீ 

வேண்டி என்னைப் பணிகொண்டாய்

வேண்டி நீயா தருள்செய்தாய் யானும் 

அதுவே 

வேண்டினல்லால்

வேண்டும் பரிசொன் றுண்டென்னில் அதுவும் உன்றன் விருப்பன்றே.🤝🤝

மாணிக்க வாசகர் அபிராமி பட்டரைபோலவோ , திருமங்கை ஆழ்வார் போலவோ இது கிடைக்கும் அது கிடைக்கும் என்று ஏலம் போடவில்லை ... 

ரத்தின சுருக்கமாய் சொல்கிறார் ... 

எனக்கு எது நல்லது எது வேண்டும் என்பது என்னை விட உனக்குத்தான் அதிகம் தெரியும் .. 

 *வேண்டத் தக்கது அறிவோய் நீ -* 

உயிர்களுக்குத் தேவையானது இது என்று அறிவோன் நீயே; 

 *மேலும், வேண்ட -* 

அவ்வுயிர்கள் எவற்றை வேண்டினாலும், முழுதும் தருவோய் நீ - 

அவையெல்லாவற்றையும் அருளுபவனும் நீயே; 

 *வேண்டும் அயன்மாற்கு* - 

உன்னைக் காண விரும்பிய பிரமன் திருமால் என்பவருக்கும், 

 *அரியோய் நீ -* 

அருமையாய் நின்றவனாகிய நீ; 

 *வேண்டி* - நீயாகவே விரும்பி, 

 *என்னைப் பணி கொண்டாய் -* 

என்னையாளாகக் கொண்டனை; 

 *நீ வேண்டி* - என் பொருட்டு நீ விரும்பி, 

 *யாது அருள் செய்தாய் -* *

எதனை அருள் செய்தனையோ, அதுவே யானும்

 *வேண்டின் அல்லால்* - அதனையே யானும் விரும்புவதல்லது, 

 *வேண்டும் பரிசு ஒன்று -* நானாக விரும்புகின்ற பொருள் ஒன்று, உண்டு 

*என்னின்* - உளதாகுமெனில், 

 *அதுவும் உன்றன் விருப்பு அன்றே -* 

அந்தப் பொருளும் உன்னிடத்தில் நான் வைக்கின்ற அன்பேயன்றோ?

நீ எது கொடுத்தாலும் அது என் நன்மைக்கே என்று சுருக்கமாக முடிக்கிறார் . ஆனால் நம்மில் பலருக்கு பலன்களை பட்டியல் போட்டு காண்பித்தால் தான் கொஞ்சமாவது நம்புவார்கள் 🙏

எல்லாம் கிடைத்து விட்டது . நிலையான மனம் இல்லாவிட்டால் 

மீண்டும் மீண்டும் ஆசைக்கடலில் மூழ்கி விடுவோமோ .. 

*கனம்* தரும்  அன்பர் என்பவருக்கே நிலையான பெருமையும் ஸ்திரமான மனதும் கிடைக்கும் .. 

ஒரு கேள்வி பிறக்கும் அவளுக்கு அந்த பாரபட்சம் கிடையாதே அன்பர் என்பவர் அன்பர் இல்லாதவர் என்று ... 

அன்பர் இல்லாதவர்களுக்கும் அருள்வாள் .. 

கனம் தருவாள் .. பிணி கொடுத்து அதற்கு மருந்தும் அவளே கொடுப்பாள் 🥇🥇🥇

கார்மேனிச் செங்கண் கதிர்மதியம் போல் முகத்தான்

 *நாராயணனே நமக்கே பறை தருவான்*

ஆண்டாள் பாடினாள் அதே போல பட்டரும் இங்கே அன்பர் *என்பவர்கே* அபிராமி *கடைக்கண்களே* ' என்று இருமுறை ஏகாரத்தை இட்டிருக்கிறார்🤝🤝🤝

செல்வம் எல்லாம் எல்லாருக்கும் தந்து விடுகிறாள் அபிராமி அன்னை!

பொதுவா உலகில் கண்கள் பேசும் பேச்சால் தான் மனம் கலைகிறது!

காதலியின் கண்களில் காதல்

அன்னையின் கண்களில் கண்ணீர்

தந்தையின் கண்களில் கோபம்

குழந்தையின் கண்ணில் அன்பு

நட்பின் கண்ணில் பாசம்

அல்லோர் கண்ணில் வெறி

நல்லோர் கண்ணில் கருணை

இப்படி கண்களால் கலைந்து போகும் மனத்துக்கு, கண்களாலேயே மருந்திடுகிறாள் அன்னை அபிராமி!

அதான் ஏகாரம் - *கடைக் கண்க"ளே"!* 

மனம் பறந்து போகாமல் அதுக்கு கனம் தரும், கடைக் கண்களே!

இது எல்லாருக்கும் கிட்டி விடுமா-ன்னா..கிட்டும்...

அதைப் பெற்றுக் கொள்ளச் சரியான பாத்திரம் வைத்திருந்தால்! 

அது தான் *அன்பர் என்பவர்க்"கே"!* 🥇🥇🥇

அங்கே ஏகாரம் இதற்காக, 

அன்பர் என்பவர்க்கே, 

நீங்கள் உண்மையான அன்பர் இல்லாவிட்டால் கூட, நாடகத்தால் உன்னடியார் நடுவே புகுந்து ... என்று மணிவாசகர் கூறியது போல் அன்பர் என்று நினைப்பவர்களுக்கு கூட அருள் கொடுப்பவள் அன்னை அபிராமி என்று அன்னையின் அருள் திறத்தை பாடுகின்றார் அபிராமி பட்டர்.🥇🥇🥇

வேண்டத்தக்கது 

அறிவாள் அவள் வேண்ட முழுதும் தருவாள் அவள் ...

பக்தி வேண்டும் நம்பிக்கை வேண்டும் மனதில் உறுதி வேண்டும் 🙏🙏🙏

தனம் தரும் கல்வி தரும் 

=======